Өзгөн райондук сотунда мушташ чыгып, 2 жаран бычакталды

Өзгөн райондук сотунун имаратынын жанында 2 жаран бычакталды. Бул тууралуу Ош облустук милициясы кабарлады.

Маалыматка ылайык, окуя бүгүн, 22-апрелде болгон. Анда соттук отурумга катышууга келгендердин ортосунда пикир келишпестик жаралып, мушташа кетишкен. Натыйжада, 42 жана 36 жаштагы жарандар бычактан жаракат алып, ооруканага кайрылышкан.

Ал эми бычактоого шектелген жаран милицияга жеткирилген. Жабырлануучуларга тийиштүү экспертизалар дайындалды. Учурда тергөөгө чейинки текшерүү иштери уланууда.

Автор: Кылымбек Бейшеев