Министрлик кош бойлуулук боюнча жөлөк пул берүү шарттарын түшүндүрдү

Эмгек министрлиги кош бойлуулук жана төрөт боюнча жөлөк пул алуучулардын категориялары жана аны дайындоо шарттары жөнүндө түшүндүрмө берди.

Ага ылайык, бул жөлөк пулду берүү тартиби өкмөттүн 2018-жылдын 18-сентябрындагы токтому менен бекитилген.

Аталган документтин нормаларына ылайык, бул төлөмдү алууга төмөнкү жарандар укуктуу:

Иштеген жарандар: Иш берүүчүлөр менен эмгек келишиминде турган адамдар.
Жеке ишкерлер: Ишкердик иш жүргүзүп, камсыздандыруу төгүмдөрүн төлөп жаткан адамдар.
Дыйкан (фермер) чарбаларынын мүчөлөрү.
Расмий жумушсуздар: Белгиленген тартипте иш менен камсыз кылуу кызматтарында расмий жумушсуз деп таанылган жана жумушсуздук боюнча жөлөк пул алууга укугу бар аялдар. Мында милдеттүү шарт болуп жалпы камсыздандыруу стажынын кеминде 12 ай болушу саналат.