Кытайда Дональд Трампка жасалган кол салуу аракети боюнча биринчи жолу расмий билдирүү жасалды

Вашингтондо АКШнын президенти Дональд Трампка карата жасалган кол салуу аракетине байланыштуу Кытай биринчи расмий реакциясын билдирди. Бул тууралуу Sky News'тун маалыматына таянып Tengrinews.kz кабарлады.

Кытайдын расмий реакциясы

Кытайдын Тышкы иштер министрлигинин өкүлү Линь Цзянь бул окуя боюнча билдирүү жасап, Пекин кырдаалды тыкыр көзөмөлдөп жатканын айтты.

“Кытай бул ок атуу окуясын жакындан байкап турат. Биз мыйзамсыз зомбулук аракеттерине дайыма каршыбыз жана аларды айыптайбыз”,- деди ал басма сөз жыйынында.

Трамптын Кытайга сапары пландалууда

Маалыматтарга караганда, Дональд Трамп 14-15-май күндөрү Пекинге сапар менен барууну пландап жатат. Бул сапар акыркы сегиз жыл ичиндеги Кытайга болгон биринчи расмий сапар болушу мүмкүн. Ал сапарда Трамп Кытайдын лидери Си Цзиньпин менен жолугушары күтүлүүдө.

Окуя кайсы жерде болду?

Окуя 25-апрелдин кечинде Вашингтон шаарындагы Washington Hilton мейманканасында болгон. Ал жерде Ак үйдүн журналисттери менен АКШ администрациясынын өкүлдөрү катышкан жыл сайын өтүүчү расмий кечки тамак уюштурулуп жаткан.

Күтүүсүз ок атылган соң, залда болгондордун баары, анын ичинде Трамп жана анын жубайы да тез арада эвакуацияланган.

Шектүүнүн кармалышы

Ок атууга шектелген адам окуядан кийин бат эле кармалган. Маалыматка ылайык, коопсуздук кызматынын бир өкүлү жаракат алган.

Шектүү катары Калифорниядан келген 31 жаштагы Коул Томас Аллен көрсөтүлгөн. Ал мурда мугалим болуп иштеп, компьютердик оюндарды иштеп чыгуу менен да алектенген.

Ал мурда соттолбогон жана полициянын көңүлүнө илинбеген.

Айыптоо жана мүмкүн болгон жаза

27-апрелде Коул Томас Алленге АКШ президентине кол салуу аракети, куралды мыйзамсыз ташуу жана колдонуу боюнча айып тагылган. Эгер күнөөсү далилденсе, ага өмүр бою эркинен ажыратуу жазасы каралышы мүмкүн.

Автор: Максуда Кудайбердиева