Караколдогу суу каптаган МИКтин үйлөрү: Жашоочулардын нааразычылыгы уланууда (видео)

Каракол шаарынын Хан-Теңири кичи районундагы Мамлекеттик ипотекалык компаниянын жаңы көп кабаттуу үйлөрүн жаандан кийин суу каптап, ал маселе боюнча нааразычылык уланууда. Батир алган тургундар компания өкүлдөрү менен жолугушуп, окуя боюнча ишкана тараткан расмий маалыматка макул эместигин билдиришти.

МИК буга чейин суу каптоого чатырга таштаган тиричилик таштандылары себеп болгонун маалымдаган эле. Бирок батир ээлери "бул маалымат чындыкка дал келбейт" дешүүдө. Алардын айтымында, бул үйгө жашоочулар көчүп келгенден бери үчүнчү жолу кайталанып жаткан окуя жана мурдагы кемчиликтер үстүртөн гана оңдолгон.

Ошондой эле тургундар суу чатырдан эле эмес, терезелердин боштуктарынан да киргенин айтып, үйдүн сапаты боюнча да суроо салышууда. Суу каптагандан улам көпчүлүк батирлердеги эмеректер жана ички жасалгалар жабыркаганын айтышты.

Мындан тышкары, батирлер ным тартып жатканын белгилешти.