Кыргызстанда маунтинбайк боюнча чемпиондук башталды

24-майда Аламүдүн районунун Орто-Сай айылында маунтинбайк боюнча Кыргызстандын ачык чемпиондугу башталды. Бул тууралуу Дене тарбия жана спорт агенттигинен билдиришти.

Маалыматка ылайык, чемпиондук эл аралык велоспорт федерациясы - USI'нин алкагында уюштурулуп, ага жалпы 50гө жакын спортчу катышууда. Мелдештин жыйынтыгында спортчуларга эл аралык рейтинг үчүн упайлар ыйгарылат.

Аталган мелдеш кросс-кантри жана даунхилл дисциплиналары боюнча өтүп, "Жеңиш" олимпиадалык резервдеги адистештирилген балдар-өспүрүмдөр спорт мектебинин тарбиялануучуларынан беш улан жана эки кыз катышууда.

Ошондой эле Балыкчы шаарынан келген спортчулар жана Казакстан, Чехия, Голландия, Англия мамлекеттеринен келген чет элдик коноктор күч сынашууда.

Автор: Меерим Кабылова
Фото: Дене тарбия жана спорт мамлекеттик агенттиги