Дүйнөдөгү эң кымбат банан Франциядагы көргөзмөдөн уурдалды

Франциянын Мец шаарында өткөн "Чексиз жекшемби" көргөзмөсүндө италиялык сүрөтчү Маурицио Каттеландын белгилүү "Комедиант" аттуу инсталляциясы уурдалды. Арт-объект дубалга күмүш түстөгү скотч менен жабыштырылган банандан турат.

Музей кызматкерлери жоголгонун 30-майда аныктап, полицияга кайрылышкан. Бирок көргөзмөнүн уюштуруучулары чыгарма зыян тартпаганын белгилешип, банандын ордуна жаңысын илип коюшкан.

"Комедиант" чыгармасы дүйнөлүк деңгээлде чоң талкуу жараткан. Алгачкы эки инсталляция 2019-жылы 100 миң доллардан ашык суммага сатылган. Кийин америкалык сүрөтчү Дэвид Датун бананды дубалдан алып жеп коюп, муну "Ач сүрөтчү" аттуу арт-перформанс деп атаган.

2024-жылы үчүнчү нускасын криптовалюта ишкери Жастин Сан 6,2 миллион долларга сатып алып, чыгарма кайрадан дүйнө коомчулугунун көңүлүн бурган.

Сүрөтчү Маурицио Каттеландын айтымында, "Комедиант" искусствонун баалуулугу тууралуу талаш-тартыштарды жаратуу үчүн ойлоп табылган. Бүгүнкү күнгө чейин бул чыгарма искусство сүйүүчүлөр арасында кызуу талкууланып келет.

Автор: Айзада Кыдырмышева