Акыйкатчы аппараты: Кара-Кечеде каза болгон Айбек Мамбеталиевдин иши Нарын облусундагы өкүлчүлүктүн көзөмөлүндө болот

Кара-Кечеде каза болгон Айбек Мамбеталиевдин иши Акыйкатчы аппаратынан Нарын облустук өкүлүнүн көзөмөлүндө болот. Бул тууралуу бүгүн, 28-январда SUPER.KG порталына акыйкатчынын аппарат бөлүмүнүн башчысы Гүлзина Асаналиева билдирди. “Менин билишимче бул факты боюнча тергөө иштери жүрүп жатат. Ар бир аймакта акыйкатчынын өкүлчүлүктөрү бар. Аталган маселе Нарын облусундагы өкүлдүн көзөмөлүндө болот. Адам укуктары бузулган кырдаалдар аныкталса, чара көрүлөт”,- деди Асаналиева.

Эске салсак, бүгүн Жумгал райондук ички иштер башкармалыгынын алдында боз үй тигилип, Айбек Мамбеталиевдин жакындары митингге чыгышкан. Алар “Нарын ОИИББинин башчысы Нарынбек Молдоисаев кызматтан кетсин”, “Айбекти өлтүргөндөр жазаларын алышсын”, “Биз акыйкатты талап кылабыз” деген жазууларды илип алышкан. Өткөн жылдын 1-декабрында милиция кызматкерлери Чаек айылынын тургуну А.Мамбеталиевди катуу сабап салышкан. Анын кесепетинен жабырлануучу ооруканага жетпей каза болуп калган.

Автор: Айпери Ганыжан кызы