Ошто “Келечек досторун чакырат” жайкы лагеринин биринчи этабы аяктады

Ош шаарындагы “Келечек” балдардын чыгармачылык борборунда салтка айланган “Келечек досторун чакырат” жайкы лагеринин биринчи этабы жыйынтыкталды. Бул тууралуу шаардык мэриядан билдиришти.

Маалыматка ылайык, иш-чарага шаардык мэриянын өкүлдөрү, депутаттар, ата-энелер жана коомчулуктун өкүлдөрү катышты. Лагерге 150дөн ашуун бала тартылып, алардын арасында аз камсыз болгон үй-бүлөлөрдүн балдары жана окууда, коомдук иштерде өзгөчөлөнгөн окуучулар болду.

Лагердин алкагында балдардын жайкы эс алуусун мазмундуу уюштуруу, чыгармачылык жана интеллектуалдык жөндөмдөрүн өнүктүрүү үчүн ар түрдүү иш-чаралар өткөрүлдү.

Белгиленгендей, “Келечек досторун чакырат” жайкы лагери жыл сайын уюштурулуп, социалдык колдоого муктаж үй-бүлөлөрдүн балдарына жардам берүү жана алардын таланттарын өнүктүрүүгө багытталган маанилүү долбоорлордун бири болуп саналат.

Автор: Айзада Кыдырмышева