Ошто жаңы эс алуу аллеясы курулууда

Ош шаарындагы Анар-1 конушунда жаңы аллеянын курулушу жүрүп жатат.

Мэриянын маалыматына ылайык, бул аймак тынч эс алуу зонасы катары уюштурулуп, тургундардын эс алуусуна ыңгайлуу шарттар түзүлөт. Буга чейин аталган жерде балдар ойноочу аянтча каралган эмес.

Жаңы аллеяга отургучтар жана беседкалар орнотулуп, аймакты көрктөндүрүүгө өзгөчө көңүл бурулууда. Ошондой эле жашылдандыруу иштеринин алкагында 200дөн ашуун декоративдүү бадал отургузулду.

Долбоор бүткөндөн кийин аллея жергиликтүү тургундардын эс алуусу үчүн заманбап жана ыңгайлуу коомдук жайлардын бирине айланары күтүлүүдө.

Автор: Айзада Кыдырмышева