Футбол-2026: Канада менен Катардын беттеши массалык мушташ менен аяктады

Футбол боюнча Дүйнө чемпиондугунун В тайпасында өткөн Канада менен Катардын беттешинен кийин оюнчулар жана командалардын кызматкерлери катышкан массалык жаңжал чыкты.

Беттеш Канаданын Ванкувер шаарындагы стадиондо өттү. Канада курамасы Катарды 6:0 эсебинде жеңди.

Канадалыктардын курамында Кайл Ларин бир гол киргизсе, Жонатан Дэвид хет-трик жасап үч жолу айырмаланды. Дагы бир голду Натан-Дилан Салиба киргизди. Ал эми Катардын жарым коргоочусу Мохамед Аль-Маннаи өз дарбазасына автогол киргизип алды.

Катар курамынан Хомам Аль-Амин 33-мүнөттө, ал эми Ассим Мадибо 53-мүнөттө кызыл айып кагазын алып, оюндан четтетилди.

2026-жылдагы Дүйнө чемпиондугу АКШ, Канада жана Мексикада уланууда.

Автор: Замира Ниязбекова