Футбол боюнча Дүйнө чемпиондугундагы келишимдүү футболчулар күйөрмандардын көңүл борборунда

2026-жылкы футбол боюнча дүйнө чемпиондугу талаадагы оюндар менен гана эмес, оюнчулардын келбети жана стили менен да кызуу талкууланууда. Социалдык тармактарда айрым футболчулар күйөрмандардын өзгөчө сүймөнчүлүгүнө ээ болуп, турнирдин жаңы секс-символдоруна айланышты.

Мадука Окойе – социалдык тармактардын жаңы жылдызы

Нигерия курамасынын эки метрлик дарбазачысы Мадука Окойе Португалияга каршы оюн учурунда камерага көп көрсөтүлгөндөн кийин интернетте чоң популярдуулукка ээ болду. Немис жана нигериялык тамырлары бар 26 жаштагы футболчунун модель сымал келбети миңдеген жаңы күйөрмандарды өзүнө тартты.

Колдонуучулар анын стилин, спорттук дене түзүлүшүн, татуировкаларын жана харизмасын өзгөчө белгилешүүдө. Ошол эле учурда футболчу жеке жашоосун көпчүлүккө жарыялабайт. Анын сүйүктүүсү модель Джелисия Вестхофф жана үч жаштагы уулу бар.

Лукас Бергвалль – швед жигити

Швециянын жаш жарым коргоочусу Лукас Бергвалль дагы дүйнө чемпиондугундагы оюнунан тышкары келбети менен талкууга түштү. 20 жаштагы футболчунун көк көздөрү, жүзүнүн түзүлүшү жана спорттук келбети күйөрмандардын көңүлүн бурду.

Стокгольмдо спортчулар үй-бүлөсүндө чоңойгон Лукас учурда Tottenham Hotspur клубунда ойнойт. Анын сүйлөшкөн кызы модель Маккензи Медлок экени белгилүү.

Возинья – эмоциясы менен жүрөктөрдү багындырган оюнчу

Кабо-Верде курамасынын дарбазачысы Возинья (Жозимар Диаш) дүйнө чемпиондугундагы эң таасирдүү каармандардын бири болду. Колумбия менен болгон тарыхый тең чыгуудан кийин анын көз жашын төгүп кубанганы көпчүлүктүн жүрөгүн козгоду.

40 жаштагы футболчу профессионалдык карьерасынан тышкары пляждык волейбол боюнча машыктыруучу жана электрик болуп да иштеген. Социалдык тармактарда көптөр анын жөнөкөйлүгүн, эмгекчилдигин жана сезимтал мүнөзүн жогору баалашууда.

Футболдон тышкары

Быйылкы мундиал көрсөткөндөй, күйөрмандар оюнчулардын голдоруна гана эмес, алардын мүнөзүнө, жашоо образына жана жеке окуяларына да кызыгышат. Социалдык тармактарда айрым футболчулар спорттук жетишкендиктери менен катар харизмасы жана өзгөчө келбети аркылуу дүйнөлүк жылдызга айланып жатышат.

Автор: Айзада Кыдырмышева