Бүгүн, 29-январда Бишкекте Дүйшөнкул Шопоковдун жаркын элесине арналган бокс боюнча Эл аралык мелдеш старт алды

Алгачкы беттештерде кыргыз мушкерлери жеңишке жетишип башташты. Командалык эсепте жеңиш ээси Кыргызстан болот деген үмүт чоң.

Бокс боюнча Кыргызстан курама командасынын башкы машыктыруучусу Адылхан Бекболотов (экинчи планда) беттештерге капталдан көз салууда. Бул мелдештин жыйынтыгында Кыргызстан курама командасына күчтүү мушкерлер иргелип алынат.

Мелдешке жандуу күбө болуу үчүн көптөгөн бокс сүйүүчүлөрү келишкен.

7 мамлекеттин мушкерлери эл алдына чакырылышты. Өмүрбек Малабеков жана Эрмек Сакенов сыяктуу мушкерлер баштаган Кыргызстан курама командасы солдон экинчи катарда турат. Кошумчалай кетсек, беттештер 10 салмак категориясы боюнча өткөрүлөт.

КРнын мамлекеттик гимни аткарылып, мелдеш "ачык" деп жарыяланды.

Шопоковдун жаркын элесине арналган мелдеш КМШ өлкөлөрүнүн ичинде ири мелдештердин бири экенин, анын деңгээли акыркы жылдары кыйла өсүп жатканын КРнын Бокс федерациясынын вице-президенти Орзубек Назаров кошумчалады.

КРнын Бокс федерациясынын президенти Абдыбакыт Халмурзаев мушкерлерге ийгилик каалап, калыстардын өз иштерин мыкты аткаруусун сураны өттү.

Дене тарбия жана спорт мамлекеттик агенттигинин директору Мурат Саралинов Дүйшөнкул Шопоковдун жубайы, жакында дүйнөдөн кайткан Керимбүбү Шопокованы эскерип, 1 мүнөттүк аза күтүүгө чакырды.