Израилдин коргоо министри: “Иран менен согуш кайра тутанышы мүмкүн

Израилдин коргоо министри Исраэль Кац Иран менен куралдуу жаңжал эки жагдайда кайра башталышы мүмкүн экенин билдирди. Бул тууралуу чет элдик басылмалар жазышты.

Анын айтымында, биринчи сценарий – АКШнын президенти Дональд Трамп Иран менен жүргүзүлүп жаткан сүйлөшүүлөр натыйжа бербей калды деп эсептеп, аскердик аракеттерди баштоо чечимин кабыл алса.

Экинчи сценарий – Иран Израилге биринчи болуп сокку урса. Кац мындай учурда “Иран менен үчүнчү согуш башталат” деп белгиледи.

Эске салсак, Израил менен Ирандын ортосундагы акыркы куралдуу жаңжалдан кийин эки өлкө ок атышууну токтотуу боюнча макулдашууга жетишкен. Бирок Израилдин коргоо министри аймактагы кырдаал дагы эле чыңалуу бойдон калып жатканын белгиледи.

Автор: Айзада Кыдырмышева