Токмокто мушташка катышкан 5 жаранга чара көрүлдү

Чүй облустук милициясы Токмокто мушташка катышкан делген 5 жаранга чара көрүлөрүн билдирди.

Маалыматка ылайык, 1-июлда саат 01:22 чамасында шаардагы "Нарын шаурма" тез татым жайынын жанында жаштардын мушташы тартылган видео аныкталган.

Дароо окуяга катыштыгы бар беш жаран аныкталып, Токмок ШИИБге жеткирилген. Териштирүүдө окуянын катышуучулары бири-бирине карата эч кандай доо-арызы жок экендигин билдиришип, арыз берүүдөн баш тартышкан.

"Ошол эле учурда коомдук тартипти бузгандыгы үчүн окуяга катышкан беш жаранга карата тийиштүү протоколдор түзүлүп, мыйзам чегинде тиешелүү чаралар көрүлөт",- дешти милициядан.

Автор: Айжанар Рыспек кызы
Фото: интернеттен алынды