Шайырбек Ташиевдин СИЗОдогу камак мөөнөтү 16-сентябрга чейин узартылды

Жогорку Кеңештин мурдагы депутаты Шайырбек Ташиевдин СИЗОдогу камак мөөнөтү 16-сентябрга чейин узартылды. Бул тууралуу бүгүн, 14-июлда Бишкек шаарынын Биринчи Май райондук соту билдирди.

Маалыматка ылайык, сот 13-июлдагы токтому менен ИИМдин Тергөө кызматынын өзгөчө маанилүү иштер боюнча башкармалыгынын улук тергөөчүсүнүн өтүнүчүн канааттандырган.

Шайырбек Ташиевге карата Кылмыш-жаза кодексинин 336-беренесинин 1-бөлүгү ("Коррупция") боюнча козголгон кылмыш ишинин алкагында бөгөт чарасы катары камакта кармоо мөөнөтү тергөө аяктаганга чейин, тагыраагы 16-сентябрга чейин узартылды.

Эске салсак, Шайырбек Ташиев үстүбүздөгү жылдын 1-апрелинде "Кыргызнефтегаз" ААКсындагы коррупциялык схема боюнча жүргүзүлүп жаткан тергөөнүн алкагында кармалган.

ИИМдин маалыматына ылайык, алдын ала эсептөөлөр боюнча мамлекетке келтирилген зыян 4,1 миллиард сомдон ашык деп бааланууда.

Автор: Максуда Кудайбердиева