ЖЫЛНААМА: Кыргызстандын алгачкы космонавты Салижан Шарипов 62 жаш мааракесин белгилеп жатат

Бүгүн, 24-августта Кыргызстандын алгачкы космонавты, Кыргыз Республикасынын жана Орусиянын Баатыры космонавт Салижан Шарипов 62 жаш мааракесин белгилеп жатат. Ал 1962-жылы Ош облусунун Өзгөн шаарында туулган. Үй-бүлөдө 7 бир тууган.

Космонавт Өзгөн шаарындагы Фрунзе атындагы мектептен билим алган. 1982-жылы Андижан шаарындагы кесиптик-техникалык окуу жайын бухгалтер адистиги боюнча бүтүргөн. Советтик Армиянын Приморье крайындагы авиациялык полкунун техникалык бөлүгүндө кызмат өтөгөн. Харьковдогу жогорку аскердик-учкучтар окуу жайын бүтүргөн. Окуусун бүткөн соң мекенине кайтып келип, Токмок шаарындагы окуу-машыгуу полкунда эмгек жолун баштаган. 1990-жылдан космонавттарды даярдоо борборунда – “Жылдыздар шаарчасында” татаал даярдык окуунун баскычтарынан өтүп, сыноочу-космонавт жана инженер-эколог кесибине ээ болот.

Кийинчерээк Шарипов атайын тандоодон өтүп, АКШдагы Лондон Жонсон атындагы учкучтарды даярдоо борборунда америкалык коллегалары менен бирдикте “Спейс-шаттлдын” космостогу системин толугу менен өздөштүрүп, 1998-жылы 22-январда Канаверал тумшугунан америкалык-орусиялык экипаждын курамында Хьюстон шаарындагы Линдон Жексон атындагы учуу станциясынан “Шаттл STS Endeowor” космос корабли менен Орусиянын 88, ал эми дүйнө жүзү боюнча 380-космонавт болуп космоско учкан. Салижан Шарипов космостон "Шак” деген ысым алган.

Салижан Шарипов тууралуу кызыктуу фактылар

Алгачкы ирет космоско учканда Кыргызстандын желегин жана бир түйүнчөккө топурагын салып алган.
Эки жолу ачык космоско чыккан.
2012-жылы "Орусия сыймыктанган мусулмандар" даректүү тасмасына тартылган.
2014-жылы Салижан Шарипов Түндүк уюлга Кыргызстандын мамлекеттик желегин расмий түрдө орноткон.

Жубайы Насиба Шарипова менен 1 уул, 1 кызды тарбиялап келишет. Анын уулу Жахангир Кыргызстанда жарандык авиациянын учкучу болуп эмгектенет. Салижан Шариповдун ысымы Ош шаарындагы №22 мектепке, ошондой эле Ош облусундагы бир нече мектепке жана көчөгө берилген.

24-августка карата жылнаама.

Автор: Меерим Кабылова