Зеленский Трамптын өкүлдөрү менен эмнени сүйлөшкөнүн ачыктады

Украинанын президенти Владимир Зеленский 6-сентябрда Киевде АКШ президентинин атайын өкүлдөрү Стив Уиткофф жана Жаред Кушнер менен өткөн сүйлөшүүлөрдүн жыйынтыгын билдирди.

Чет элдик ЖМКлар жолугушууда согушту токтотуу, Украинанын коопсуздук кепилдиктери, өлкөнү калыбына келтирүү, экономикалык колдоо жана аймактык маселелер талкууланганын жазышууда.

Зеленский Украина кышка даярданып жатканын айтып, абадан коргонуу жана энергетика тармагында АКШнын кошумча колдоосуна муктаж экенин белгиледи. Ошондой эле согуштук аракеттер кышында да уланышы мүмкүн экенин билдирди.

Эскерте кетсек, Уиткофф менен Кушнер Москвада Орусиянын президенти Владимир Путин менен сүйлөшкөндөн кийин 6-сентябрда Киевге барышкан. Америкалык өкүлдөр кыш келгенге чейин тынчтык жараянына келүүнү көздөп жатышканын билдиришкен.

Автор: Замира Ниязбекова