Бишкекте мас айдоочу электровелосипедчендерди сүзүп, алардын бири каза болду (видео)

Бишкекте 27-сентябрга караган түнү жол кырсыгы катталып, бир өспүрүм каза болду. Бул тууралуу бүгүн, 28-сентябрда Милициянын кайгуул кызматы билдирди.

Маалыматка караганда, кырсык саат 00:30 чамасында Тоголок Молдо көчөсү менен Фере көчөсүнүн кесилишинде болгон.

Алдын ала маалымат боюнча, 1990-жылы туулган А.А. аттуу айдоочу Mazda-323 үлгүсүндөгү унаасы менен түндүктү көздөй бара жатып, №273а үйдүн тушунда ошол эле багытта бара жаткан электровелосипедди сүзүп кетти. Кырсыктан электровелосипеддин 2008-жылы туулган жүргүнчүсү И.М. алган жаракаттарынан улам окуя болгон жерде каза болгон. Ал эми 2009-жылы туулган айдоочусу А.Н. ар кандай жаракаттарды алып, №4 шаардык клиникалык ооруканага жеткирилди.

Унаанын айдоочусу милиция тарабынан кармалган. Алдын ала маалымат боюнча, ал мас абалда болгон.

Бул факты боюнча Кылмыш-жаза кодексинин 312-беренесинин 5-бөлүгүнө ылайык кылмыш иши козголуп, шектүү убактылуу кармоочу жайга киргизилди.

Учурда тиешелүү экспертизалар дайындалып, кырсыктын бардык жагдайлары такталууда.