АКШда Хэллоуин майрамы учурунда 76 адам каза тапты (видео)

АКШдагы Хэллоуин майрамы учурунда 76 адам каза таап, 201 киши жаракат алды.

Чет элдик басылмалар жазышкандай, жумадан жекшембиге чейин өлкөнүн ар кайсы аймактарында атышуулар орун алган. Алсак:

Техастын Дип Эллум конушунда түндө үч атышуу болуп, төрт адам набыт кетсе, 15 адам жаракат алган.
Калифорнияда жайгашкан соода борборунун сыртындагы атышуудан 31 жаштагы кош бойлуу аял каза болуп, алты адам жаракат алган.
Флоридадагы кечелерде 17 жаштагы кыз жана 20 жаштагы эркек киши каза болуп, 11 адам жаракат алган.
Монтанада шерифтин орун басары каза болуп, дагы бир полиция кызматкери жаракат алган.
Иллинойстогу университеттердин жанында жана көчөлөрдө болгон атышуулар 19 жаштагы аялдын өмүрүн алып, ондогон адамдарды ооруканага жаткырган.

Хэллоуин ишемби күнү болгондуктан, массалык майрамдар дем алыш күндөрү да уланган. Статистикага кечелердеги чыр-чатактар жана үй-бүлөлүк зомбулук кирет. Полиция окуяларды иликтеп жатат.