Сузак районундагы мечиттин урашы боюнча кылмыш иши козголду

Сузак районундагы мечиттин урашы боюнча кылмыш иши козголду. Бул туурасында Сузак РИИБинин башчысы Нурбек Жаныбеков SUPER.KG порталына билдирди.

Маалыматка караганда, КРнын Кылмыш-жаза кодексинин 258-беренеси (коопсуздук талаптарына жооп бербеген иштерди аткаруу же кызмат көрсөтүү) боюнча кылмыш иши козголуп, тергөө амалдары жүрүп жатат.

“Учурда район башчысынын буйругу менен комиссия түзүлдү. Комиссия 2 ай ичинде кырсыктын келип чыгуу себебин аныктайт. Ошону менен бирге Сузак районундагы мечиттер каттоого алынып, алардын абалы да текшерүүдөн өтөт. Учурда райондо 120дан ашык мечит бар”, - деди Нурбек Жаныбеков.

Ошондой эле бүгүн Жалал-Абад облусунун губернатору кырсык болгон жерге барып, ооруканада дарыланып жаткандардын абалы менен таанышат.

Эске сала кетсек, кечээ, 3-февралда Сузак районунун Ырыс айыл аймагында жайгашкан мечит-медресенин экинчи кабаты урап, 56 адам жабыркаган. Анда 1953-жылы туулган маркум Бактыяр ажы Ясынахуновго жаназа намазы окулуп жаткан. Ага 700дөй адам катышкан. Намаз окулуп бүтүп, эл сыртка чыгып жаткан учурда мечит-медресенин экинчи кабатынын 42 чарчы метр жыгач полу көтөрө албай урап кеткен. Ж абыркагандардын экөөсүнүн кыр арка сөөгү сынып кеткен.

Автор: Бекжан Рыскулов