Кыргызстандын оор атлетика курама командасы жаштар арасындагы Олимпиадага 1 жолдомо утту

Оор атлетика боюнча Кыргызстан курама командасы быйыл өтө турган жаштар арасындагы Олимпиада оюндарына 1 жолдомо утуп алды. Бул тууралуу Оор атлетика боюнча эл аралык федерациянын расмий сайты билдирет.

Маалыматка ылайык, быйыл 16-28-август аралыгында Кытайда өтө турган жаштардын Олимпиадасына жолдомо 4-9-март аралыгында Таиландда өткөн Азия чемпиондугунун жыйынтыгы аркылуу ойнотулду. Кыргызстан курама командасы 174 упай топтоп, командалык эсепте 3-орунду ээледи. Жолдомо алуу үчүн алдынкы 5 орундун бирин камсыздоо керек болчу.

Таиланддагы мелдештин жыйынтыгында Кыргызстандан тышкары командалык эсепте алдынкы бештикке Түштүк Корея, Индонезия, Тайпэй жана Сирия командалары кирип, жолдомого ээ болушту.

Автор: Максат Кудайбердиев