Бишкекте пауэрлифтинг боюнча Кыргызстандын Ачык чемпиондугу болуп өттү

15-16-март күндөрү Бишкек шаарынын Кожомкул атындагы Спорт Ордосунда пауэрлифтинг боюнча (IPF версиясы, жатып штанга көтөрүү) Кыргызстандын Ачык чемпиондугу болуп өттү.

Мелдешке Кыргызстан, Орусия, Казакстан жана Кытайдан 140 спортчу катышты. Мелдеш “Бир бол” партиясынын колдоосу менен өткөрүлдү.

Чемпиондук жарыш бир нече салмактык категорияда, жаш өзгөчөлүктөрүнө жараша эркектер жана айымдар арасында болду.

Мелдештин ачылышында “Бир бол” партиясынын өкүлү Мирлан Макушев аталган партия сергек жашоого үгүттөөрүн, пауэрлифтинг, самбо, ат оюндары, күрөш жана бокс федерациялары менен кызматташарын белгиледи.

Ал эми Бишкек шаардык спорт комитетинин жетекчиси Шейшенкул Бакиров пауэрлифтинг боюнча үч федерация: IPF, WPC, IPC бириккенин айтты. Ал мындай биргелешүү, достук мамиледе иш алып баруу кубантарлык экенин, бул жагдай эл аралык деңгээлде чоң жетишкендиктерге алып келерине ишенерин баса белгиледи.

Кыргызстандын Пауэрлифтинг боюнча федерациясынын (IPF версиясы) президенти Гүлжан Нурлаева: “Бул мелдешке катышкандардын арасында ден соолугунун мүмкүнчүлүгү чектелген спортчулар аз эмес. Алар Араб Эмираттарында өтүүчү чемпиондукка даярданышууда. “Бир бол” партиясынын жардамысыз бул турнир өткөрүлмөк эмес”,- деди.

Автор: Айпери Ганыжан кызы