Ноорузга карата уюшулган көк бөрү мелдешинин жарым финалында “Талас” менен “Бөрүлү”, “Суусамыр” менен “Кабылан” кез келет

Нооруз майрамына карата уюшулган көк бөрү боюнча мелдештин жарым финалчылары аныкталды. Анда “Талас” менен “Бөрүлү”, “Суусамыр” менен “Кабылан” кез келет. Бул тууралуу Улуттук оюндарды өнүктүрүү борборунан кабарлашты.

Эртең, 20-мартта орун ала турган жарым финалда биринчи оюн “Талас”-“Бөрүлү” командаларынын ортосунда болот. Беттешке саат 11:00дө старт берилет. Бул таймаш жыйынтыкталган соң “Суусамыр”-“Кабылан” командалары күч сынашат.

Ал эми финалдык беттеш жана 3-орун үчүн болгон оюн 21-мартка туураланган. Башталыш сааты 10:00.

Кошумчалай кетсек, 16-18-март аралыгында “Аккула” ат майданында тайпалык баскычтагы оюндар өтүп, 11 команда 4 тайпага бөлүнгөн. Өз тайпаларынан жеңип чыккан командалар жарым финалга жолдомо алышты. Бүгүн, 19-мартта командалар эс алууда.

Автор: Максат Кудайбердиев