УЕФАнын Чемпиондор Лигасы: Бүгүн мадриддик “Реал” мюнхендик “Баварияны” кабыл алат

Бүгүн, 23-апрелде УЕФАнын Чемпиондор Лигасынын жарым финалында мадриддик “Реал” менен мюнхендик “Бавария” биринчи беттештерин өткөрүшөт. Бул тууралуу УЕФАнын расмий сайты билдирет.

Маалыматка ылайык, беттеш Бишкек сааты боюнча 00:45те орун алат. Финалдык жолдомо үчүн үйдө-конокто системи 2 оюн ойной турган бул командалардын ортосундагы жооптук беттеш 29-апрелде өтөт.

Башкы машыктыруучулардын оюн алдындагы пикирлери:

Хосеп Гвардиола, “Бавариянын” башкы машыктыруучусу:

"Мадрид шаарына “Реалга” каршы оюнга “Бавария” сыяктуу күчтүү команда менен келип жатканым кубандырат. Өз оюнубузду көрсөтүп, тиешелүү жыйынтык алууга умтулабыз. Эгер биз уткубуз келсе, жогорку деңгээлдеги футболду көрсөтүшүбүз керек. “Реал” футболдук клубу кайсы оюнчу ойнобосун, кайсы башкы машыктыруучу жетектебесин, мыкты болуп келген, мыкты боло берет".

Карло Анчелотти, “Реалдын” башкы машыктыруучусу:

“Реал” акыркы жолу “Барселонага” каршы оюнда өз деңгээлин көрсөттү. Биз “Баварияга” каршы оюнда да ошону кайталоону көздөп турабыз. Гвардиола машыктырган азыркы “Бавария” менен “Барселонанын” оюн стилдери окшош. Биз атаандаштык чабуулун токтотуп чектелбей, өз оюнубузду көрсөтөбүз”.

Автор: Максат Кудайбердиев