УЕФАнын Чемпиондор Лигасы: Мадриддик “Реал” мюнхендик “Баварияны” 1:0 эсебинде утуп алды

Оюн 1:0 эсебинде жыйынтыкталды. Жалгыз голдун автору Карим Бензема "Бавариянын" лидери, Франция курама командасынын оюнчусу Франк Риберини жубатууда.

Франк Риберинин ордуна майданга чыккан Марио Гётце аз жерден оюн эсебин теңеп коё жаздады.

Жаракатынан кийин жаңы гана калыпка келген Криштиану Роналду толук ойногон жок. Аны Гарет Бэйл алмаштырды.

19-мүнөт. Бензема иштиктүү каршы чабуулдун жыйынтыгында оюн эсебин ача алды.

Оюндун биринчи мүнөтүнөн тарта "Бавариянын" чабуулчусу Марио Манжукич мадриддиктердин коргоочулары Пепе менен Серхио Рамостун катуу каршылыгына туш болду.

Кечээ, 23-апрелде УЕФАнын Чемпиондор Лигасынын жарым финалында мадриддик “Реал” менен мюнхендик “Бавариянын” биринчи беттеши болуп, “Реал” 1:0 эсебинде жеңишке жетишти. Мадриддиктерге жеңиш алып келген жалгыз голду “Реалдын” франциялык чабуулчусу Карим Бензема 19-мүнөттө киргизди.

“Реал” топту атаандашка берип, каршы чабуулга ойноду. Ал эми мюнхендик клубдун оюнчулары оюнду толук көзөмөлгө алып, оюнунун басымдуу бөлүгүн майдандын борбордук бөлүгүндө өткөрүштү.

Финалдык жолдомонун ээси 29-апрелде өтө турган жооптук беттештин жыйынтыгы менен белгилүү болот.