УЕФАнын Чемпиондор Лигасы: “Реал” конокто “Баварияны” ири эсепте утуп, финалга чыкты (фоторепортаж)

"Реалдын" оюнчулары колдоп келген күйөрмандарга ыраазычылык билдиришүүдө.

Мадриддик футболчулар финалдык жолдомонун мынчалык оңой чечилерин күтүшкөн эмес.

Башкы машыктыруучу Карло Анчелоттинин тапшырмасын эки эсе ашыра аткарган Криштиану Роналду куттуктоолорду кабыл алып жатат.

Криштиану Роналду сезондогу 16-голун айып соккусунан жаратты.

Оюндун экинчи жарымында оюн деңгээли түшүп, командалар убакытты бүтүрүү аракетин гана көрүп жаткандай таасир калтырды. Себеби "Бавария" андан ары уят болууну каалабаса, 3:0 эсеби "Реалга" да жетиштүү эле.

Криштиану Роналду оюнга чекит коюп жатат.

"Бавариянын" өткөн жылдагы мыкты оюнчусу Франк Рибери Хосеп Гвардиола менен...

"Бавариянын" башкы машыктыруучусу карьерасындагы эң ири жеңилүүгө туш болду. Топко ээлик кылуу менен ал айла таппаган соң, кандай тапшырма берерин билбегендей үнсүз гана отурду.

Криштиану Роналду оюндагы үчүнчү голду, УЕФАнын Чемпиондор Лигасынын бул сезонундагы 15-голун киргизди. 15 голду ал манжалары менен төмөнкүчө дал ушундай мүнөздө санап берип жатат.

Мануэль Нойер өнөктөштөрүнүн коргонууда чабал оюн алып барып жатканын көрсөтүүдө.

Криштиану Роналду эсеп айырмачылыгын 3 голго жеткирип, "Бавариянын" финалга чыгууга болгон үмүтүн үзүп койду.

Бастиан Швайнштайгер менен Томас Мюллер көпчүлүк сыяктуу эле майданда эмне болуп кеткенин түшүнө албай турушат.

Стандарттык абалда мыкты ойногон "Реалдын" оюнчулары Нойердин дарбазасына топту жеңил гана багыттап жатышат.

2012-жылы Серхио Рамос УЕФАнын Чемпиондор Лигасынын жарым финалында дал ушул "Бавариянын" дарбазасына 11 метрлик айып соккусун киргизе албай калган. Быйыл экинчи ирет ал командалаштарына жана күйөрмандарга "Реалды" финалга алып чыгуу тууралуу убадасын берген.

Оюндагы алгачкы гол бурчтан чыгарып берүүдө кирди. Оюн эсебин Серхио Рамос ачты.

Кечээ, 29-апрель түнү Германиянын Мюнхен шаарында УЕФАнын Чемпиондор Лигасынын жарым финалынын жооптук оюну болуп өттү. Анда “Бавария” өз үйүндө мадриддик “Реалга” 0:4 эсебинде утулуп, финалдык жолдомодон куру калды.

Оюн 1-мүнөттөн тарта курч мүнөздө башталып, “Бавария” топту көзөмөлгө алуу аракетин көрө баштады. Ал эми “Реалдын” оюнчулары иштиктүү каршы чабуулдарды уюштуруу менен алек болушту. Стандарттык абалдан Серхио Рамостун 2 голу оюндун жүрүшүн өзгөртүп койду. Бул голдор мадриддиктердин майданда дагы да ишенимдүү сезүүсүн шарттады.

“Бавария” (Германия)-“Реал” (Испания) – 0:4

Голдор: Серхио Рамос (16-мүнөт), Серхио Рамос (20-мүнөт), Криштиану Роналду (34-мүнөт), Криштиану Роналду (89-мүнөт).