Мушкер Флойд Мейвезер атаандашы Маркос Майдананы утуп, карьерасындагы 46-жеңишине жетишти

37 жаштагы мушкер 46-ирет жеңишке жетишти.

Флойд Мейвезер бул беттештин өтө оор болгонун, өз карьерасындагы эң кыйын беттештердин бирин өткөргөнүн айтты.

"Мейвезердин атаандаштарынын көбү аны сыйлап, мен сыяктуу оор соккуларды узата алган эмес",- дейт Майдана.

Америкалык мушкер, WBC версиясы боюнча Дүйнө чемпиону Флойд Мейвезер кечээ, 4-май түнү WBA версиясы боюнча Дүйнө чемпиону, аргентиналык Маркос Майдананы утуп, карьерасындагы 46-жеңишине жетишти. Бул тууралуу чет элдик маалымат булактары кабарлайт.

Маалыматка ылайык, Лас-Вегаста өткөн беттеште мушкерлер 12 раунд беттешишти. Жыйынтыгында 3 калыстын экөөсү жеңишти Мейвезерге ыйгарса (117:111, 116:112), бир калыс тең чыгуу катталганын билдирди (114:114).

Кошумчалай кетсек, 37 жаштагы америкалык мушкердин профессионалдык рингде жүргөнүнө 18 жыл болду.

Автор: Максат Кудайбердиев