Бишкекте алыш күрөшү боюнча Кыргызстандын чемпиондугу старт алды

Мелдеш алыш күрөшүнүн 3 түрү (классикалык, эркин жана кыз-келиндер арасында) боюнча өтүүдө.

Ачылыш аземин белгилүү спорт баяндамачысы Кубан Атабеков алып барды.

180 балбан катышып жаткан мелдеш өлкө гимнинин обого жаңыруусу менен ачык деп жарыяланды.

Ачылыш салтанатында Алыш федерациясынын президенти, ЖКнын депутаты Малик Осмонов сөз сүйлөдү.

Бүгүн, 12-майда Бишкектеги Кожомкул атындагы Спорт Ордосунда алыш күрөшүнүн классикалык, эрин жана кыз-келиндер арасындагы түрлөрү боюнча Кыргызстандын чемпиондугу старт алды.

Уюштуруучулар SUPER.KG порталына билдиришкендей, мелдешке 10 салмак категориясы боюнча 180 балбан катышууда. Уландар арасында 6 салмак категориясында жеңүүчүлөр аныкталса, кыз-келиндер арасында 4 салмакта өлкө чемпиондорунун ысымдары белгилүү болот. Өлкөнүн бардык аймактарынан келген балбандар катышып жаткан мелдеш 13-майда жыйынтыкталат. Кармаштардын жыйынтыгында күз айларында өтүүчү Азия оюндарынын жана Бүткүл дүйнөлүк көчмөндөр оюндарына бара турган курам бекитилет.

Автор: Максат Кудайбердиев