Кыргызстандык футболчу Валерий Кичин ойногон “Уфа” командасы Орусиянын Жогорку Лигасына чыкты

Акыркы сезонду Орусиянын Футболдук Улуттук Лигасында (1-дивизион) өткөргөн башкортостандык “Уфа” клубу кийинки сезонду Орусия Премьер-лигасында өткөрөт. Кыргызстандык футболчу Валерий Кичин ойногон “Уфанын” Жогорку Лигага чыгары кечээ, 22-майда өткөн оюндардын жыйынтыгында белгилүү болду.

Орусия Премьер-лигасында сезондо топтогон упайлардын эсебинен 13-орун менен 14-орунду ээлеп калган “Томь” жана “Крылья Советов” лигада калуу үчүн Футболдук Лиганын 3-4-орунду ээлеген командалары менен экиден беттеш өткөрдү. Натыйжада бул эки команда тең 2 беттештин жыйынтыгында утулуп, кийинки сезонду Орусиянын Футбодук Улуттук Лигасында өткөрмөй болду.

“Уфанын” коргоочусу Валерий Кичин учурда Кыргызстан курама командасынын курамында Мальдив аралдарында АФКнын Чакырык Кубогуна катышып жүрөт.

Автор: Максат Кудайбердиев