Ысык-Көл облусу боюнча 4744 окуучу мектепти бүтүрүп, алардын 70и артыкчылык менен аяктап жатат

Эртең, 24-майда Ысык-Көл облусунда Акыркы коңгуроо иш-чаралары өтөт. Бул тууралуу бүгүн, 23-майда КРнын Өкмөтүнүн ыйгарым укуктуу өкүлчүлүгүнүн басма сөз кызматы билдирди.

Маалым болгондой, жалпы облус боюнча 11-классты 4744 окуучу аяктап жатат. Мындан тышкары 9-классты 7237 окуучу бүтүрүүдө. Алардын ичинен артыкчылык менен аяктап жаткандар 11-класстардан 70 окуучуну, 9-класстардан 115 окуучуну түзөт.

Акыркы коңгуроо иш-чараларын облустагы бардык күч түзүмдөрү мектеп директорлору жана мугалимдери менен бирдикте көзөмөлгө алышмакчы. Акыркы коңгуроолорго өкмөттүн облустагы ыйгарым укуктуу өкүлчүлүгү, район, шаар жетекчилери да катышышат.

Автор: Нургазы Аматов