Таласта футбол ойноого жибербей койгону үчүн таятасын балталап салган 15 жаштагы бала күнөөсүн мойнуна алды

Таласта футбол ойноого жибербей койгону үчүн таятасын балталап салган 15 жаштагы бала күнөөсүн мойнуна алды. Маалыматка ылайык, үстүбүздөгү жылдын 12-майында Талас ОИИБине Талас шаарындагы үйлөрдүн биринен адам өлүгү табылгандыгы тууралуу маалымат түшкөн. Окуя болгон жерге укук коргоо кызматкерлери барып, каза тапкан адам 1951-жылы туулган Узак Молдокулов экенин аныкташкан. Бул тууралуу 10-июнда жеке маалымат булактарыбыз билдиришти.

Маалыматты тактоо үчүн ИИМдин басма сөз кызматына байланышканыбызда, окуя тууралуу төмөнкүдөй маалымат беришти:

"Узак Молдокулов үстүбүздөгү жылдын 18-апрелинде Талас шаарындагы үйүнөн чыгып кеткен боюнча кайрылып келген эмес. Ал эми анын туугандары Талас ОИИБине 10-майда гана “18-апрелден бери жок” деп маалымат беришкен.

Маалыматты каттоодон өткөрүп, издөө салгандан туура 2 күндөн кийин 12-майда короодо жайгашкан ороонун ичине түшкөн үйдүн келини Молдокуловдун шейшепке оролгон сөөгүн таап алган. Окуяга тиешелүү адамдарды суракка алышып, кылмышка шектүү катары маркумдун жээн-небереси, 1999-жылы туулган Санжар Сукешовду кармашкан.

Ал кылмыш кылганын мойнуна алып, 22-апрелде таятасын 3 жолу балта менен башка чаап, андан кийин даярдап койгон бычагы менен бир нече ирет сайганын айткан. Таятасын өлтүрүшүнө эмне себеп болгонун сураганда аны менен көптөн бери урушуп жүргөнүн жана ошол күнү балдар менен футбол ойногонго жибербей койгонуна ачууланып өлтүргөнүн билдирген.

Учурда 15 жаштагы Санжар Сукешовдун үстүнөн Кылмыш жана жаза кодексинин 97-беренесинин 2-бөлүмү (өзгөчө мыкаачылык менен адам өлтүрүү) боюнча кылмыш иши козголуп, тергөө иштери уланууда. Сукешовго соттук-психологиялык экспертиза жүргүзүү учурунда анын эс-акылына эч кандай доо болбогону аныкталган".

Автор: Гүлжан Асанкожоева