Футбол боюнча Дүйнө чемпиондугунун алгачкы оюну Бразилиянын 3:1 эсебиндеги жеңиши менен аяктады (фоторепортаж)

Акыркы гол Хорватиянын дарбазачысы Стипе Плетикосанын катасынан улам кирди. Дарбазачы бул жеңилүүгө катуу ыза болду.

Жеңиш алып келген эки голдун автору Неймар.

Команданын капитаны Тиаго Силва 11 метрлик айып соккусу дарбазага багытталып жаткан маалда дарбазага артын салып турду.

Оюнчулар да калыстын пикирин колдой беришкен жок.

11 метрлик айып соккусу жөнөкөй кырдаалда болуп калгандай таасир калтырды.

Калыстар дал ушул Дүйнө чемпиондугунда ак түстөгү боёк чачып, чек коюп берүүдө. Белгилүү бир убакыттан кийин боёк өчүп калат.

Неймар үй ээлеринин мелдештеги алгачкы голун киргизди.

Неймар 16 метрлик аянттын сыртынан сокку узатуу менен оюн эсебин теңей алды.

Оюнда көптөгөн эреже бузуулар катталып, айып кагаздары сунулуп жатты. Япониялык калыс Юити Нисимура сары айып кагазын 90 мүнөт ичинде 4 ирет алып чыгууга мажбур болду.

Оюн эсебин биринчи болуп ачкан хорваттардын ошол маалдагы кубанычына чек жок эле.

Алгачкы голду бразилиялыктардын коргоочусу Марсело өз дарбазасына киргизип алды.

Оюндун жүрүшүнөн...

ФИФАнын президенти Зепп Блаттер жана Бразилия Федеративдик Республикасынын президенти Дилма Русеф айым баштаган топ алгачкы оюнга кызыгуу менен көз салып отурат.

Үй ээлеринин курамынан Неймар өзгөчө байкалса, Хорватия тараптан Иван Ракитич айырмаланып турду.

Луис Филиппе Сколари баштаган Бразилиянын машыктыруучулары...

Бразилия мелдешти кабыл алып жатканына байланыштуу салт боюнча алгачкы болуп майданга чыгууга милдеттүү болчу.

Футболчулар өз өлкөлөрүнүн расмий гимндерин аткарышууда.

Оюн 48 миң кишини батыра ала турган "Арена Коринтианс" стадионунда өттү.

Футбол боюнча Дүйнө чемпиондугунун алгачкы оюну Бразилиянын 3:1 эсебиндеги жеңиши менен аяктады. Алдын ала айтылган божомолдор ордунан чыгып, үй ээси өз ысымына алгачкы 3 упайды жаза алды.

Үй ээлери оюндун 1-таймында өз оюнун табууда бир топ кыйналышты. Каршы чабуулда оюн алып барган Хорватия курама командасы оюндун алгачкы мүнөттөрүндө кооптуу чабуулдардын натыйжасында эсеп айырмачылыгында алдыга озуп чыкты. Бирок оюнда баштан-аяк топту көзөмөлүндө кармаган бразилиялыктар алгач эсеп катыштыгына тең салмактуулук алып келсе, бир топ убакыттан соң алдыга чыга алды. Бразилиянын курамынан Неймар лидерлик сапатын көргөзүп, бардык чабуулдарды уюштуруу менен катар стандарттык абалдарда топту оюнга киргизүү милдетин моюнуна алды. Бул көрүнүш көптөгөн адистердин “Бразилиянын ийгилиги Неймардын оюнунан көз каранды” деген кептин аныгына жетүүгө алып келди десек болот.

БРАЗИЛИЯ-ХОРВАТИЯ – 3:1

Голдор: Марсело (11-мүнөттө өз дарбазасына), Неймар (29-мүнөт), Неймар (71-мүнөт, пенальтиден), Оскар (90+1)