Бразилия, Дүйнө чемпиондугу: Германия Португалиянын дарбазасына 4 гол киргизип, жеңишти камсыздады (фоторепортаж)

Оюндун башкы каарманы Томас Мюллер жана мындай чоң эсептеги жеңилүүнү акылына сыйдыра албай жаткан Криштиану Роналду.

Германиянын оюнчулары атаандашынын дарбазасына 4-голду киргизишти.

Германиялыктардын курамынан Хуммельс жаракат алды.

Оюн курч мүнөздө болгондуктан, жаракат алгандар да көп болду. Фабио Коэнтрау да айласыз майдандан кетүүгө мажбур болду.

Майданда болуп жаткан окуянын баарын көрүп, билип, сезип жаткан Криштиану Роналдунун бүт күч-аракети дарбазага сокку узатуу болду.

Томас Мюллер алгачкы 45 мүнөттүк жыйынтыкталар алдында дагы бир гол жарата алды.

Пепе оюндун башкы каарманы Томас Мюллерге каршы орой ойноду. Андан кийинки кылыгы анын майдандан четтетилүүсүн камсыздады.

Калыстын ишмердүүлүгүнө ичи чыкпаган португалиялыктар оюнду курчутуп, орой ойноп башташты.

Экинчи голду Хуммельс киргизди.

Португалиянын чабуулчусу Угу Альмейда жаракат алып, майданды таштап кетүүгө мажбур болду.

11 метрлик айып соккусунда Томас Мюллер таамай болуп чыгып, оюн эсебин ачты.

Марио Гетце менен Жоау Перейранын топ үчүн болгон күрөшү германиялыктардын жеңиши менен аяктады. Калыс Германия тарапка 11 метрлик айып соккусун тебүү укугун берди.

Дарбазаны таштап чыгып кеткен Португалиянын дарбазачысын жазалоону Сами Хедира колго ала алган жок. Ачык дарбазага таамай тебе албай калган оюнчу шашканына өкүнүп жатат.

Оюн курч мүнөздө башталып, Португалия кезектеги кооптуу чабуулду ишке ашырды.

Беттешке трибунадан Германиянын канцлери Ангела Меркель, ФИФАнын президенти Йозефф Блаттер, УЕФАнын президенти Мишель Платини жана башка сыйлуу коноктор көз салып отурушту.

Бүгүн, 16-июнда Бразилиядагы Дүйнө чемпиондугунун “G” тайпасынын алгачкы оюну орун алды. Голдордун көптүгү менен айырмаланган аалам биринчилигинде Германия менен Португалия да бул салтты бузган жок. Оюндун алгачкы 45 мүнөттүгү оюндун тагдырын толук чечип койду. Анткени германиялыктар 45 мүнөт ичинде 3 гол жарата алышты. Ошол эле учурда португалиялыктардын курамынан орой ойногондугу жана эреже бузгандыгы үчүн борбордук коргоочу Пепе 37-мүнөттө оюндан четтетилди.

Беттеште мелдештеги алгачкы хет-рик (1 оюнда киргизилген 3 гол) катталды. Германиянын чабуулчусу Томас Мюллер киргизилген 4 голдун үчөөнү өз эсебине жаза алды. Ошентип, Германия алгачкы 3 упайына ээ болуп, тайпадан биринчи болуп чыгууга олуттуу билдирме жасай алды.

ГЕРМАНИЯ-ПОРТУГАЛИЯ – 4:0

Голдор: Томас Мюллер (11-мүнөт, пенальтиден), Матс Хуммельс (32-мүнөт), Томас Мюллер (45-мүнөт), Томас Мюллер (78-мүнөт).