Дүйнө чемпиондугунун чечүүчү оюндарына карабай айрым оюнчулар орозо кармоого ниеттенишүүдө

Германия курама командасынын жарым коргоочусу Месут Озилдин майданга чыгар алдында дайыма бата тартып, дуба кылганын байкоого болот.

Бразилиядагы Дүйнө чемпиондугунун тайпалык баскычы 27-июнь түнү жыйынтыкталат. Ал эми ыйык Орозо айы 28-июнга туш келет. Мелдештин чечүүчү баскычка келгенине карабай айрым мусулман футболчулар орозо тутууга ниеттенишүүдө. Бул тууралуу бүгүн, 23-июнда чет элдик маалымат булактары кабарлады.

Маалым болгондой, Кот-Д`Ивуар курамасынын коргоочусу Коло Туре баштаган футболчуларда ниет бар экени белгилүү болду. “Мен үчүн орозонун алгачкы 5 күнү гана кыйын. Андан кийин организм көнүп кетет” деп билдирген К.Туре.

Кошумчалай кетсек, Орозо айы менен Мундиаль акыркы жолу 1986-жылы дал келген. Анда да орозо туткан футболчулар болгон. Учурда аалам биринчилигине катышып жаткан оюнчулардан Месут Озил (Германияны оюнчусу), Карим Бензема, Бакари Санья (Франциянын оюнчулары), Яя жана Коло Турелер (Кот-д’Ивуар), Маруан Феллаини, Мусса Дембеленин (Бельгия) ислам дининин талаптарын так аткарып жүргөнү айтылып келет.

Автор: Максат Кудайбердиев
Фото: Интернеттен алынды