Бразилиядагы Дүйнө чемпиондугу: Тайпалык баскычта утуп чыккан 16 команда

Алжир. Орусияны плей-оффтук жолдомодон куру калтырган африкалык команда.

Бельгия. Жаш футболчулардан турган бул курамдын ийгилигине ишеним арткандар көп.

АКШ. Бул курам Германияга каршы татыктуу оюн көрсөттү.

Германия. Мелдеште жарым коргоочулардын саны жана сапаты боюнча алдына ат салдырбаган команда.

Нигерия. Африканын намысын коргоого жарай турган 2 команданын бири.

Аргентина. Бул команданы каймана түрдө Месси деп да атаса болот. Анткени команданын дээрлик бардык голдорун ушул футболчу киргизүүдө.

Швейцария. Анык европалык футболдун үлгүсүн көргөзгөн футболчулар.

Франция. Зидан сыяктуу лидер жок болсо да, Франция бул мелдештин мыкты командаларынын катарын толуктайт.

Уругвай. Чуу коштогон команда десек болот. Кийинки атаандашы Колумбия менен болгон оюнда дареметин көрөбүз.

Коста-Рика. Италия менен Англия үйүнө айдаган команда эми Греция менен тирешет.

Греция. Бул командага эч ким так аныктама бере албайт, чынында. Тайпадан чыгарына үмүт артпагандар оозун жабууга аргасыз болушту.

Колумбия. Ар бир гол кирген сайын Шакиранын жердештери болгон футболчулар бийлеп жатышат. Ал эми алардын бийин алдыда көрүүнү каалагандар аз эмес.

Чили. Испанияны уткан Чили эми Бразилияга татыктуу атаандаш болуп берерине ишенгендер көп.

Голландия. "Учуучу голландиялыктар" деп бекеринен айтылбаса керек. Бул жолу да Голландия көпчүлүктү таң калтырууда.

Мексика. "А" тайпасынан 2-орунду ээлеп чыкты. Голландия менен беттешет.

Бразилия. "А" тайпасынан биринчи болуп чыкты. Кийинки атаандашы Чили болот.

Бул жолку футбол боюнча Дүйнө чемпиондугу көп кызыктарга бай болууда. Ири эсептер, күтүлбөгөн жыйынтыктар жана европалык футбол державаларынын мелдештен "учуп кетиши" анын өзгөчөлүгүнөн кабар берсе керек. Кыскасы, "футбол карнавалы" деген тамашалуу аталышты алып жүргөн биринчилик күйөрмандардын толук купулуна толуп жатат.

27-июнга караган түнү болгон оюндардын жыйынтыгында тайпалык баскыч жыйынтыкталып, мелдештин кийинки баскычына чыккан (1/8 финал) 16 команда белгилүү болду. Ушул баскычтан баштап мелдеш чоң “согуш майданына” айланат. Анткени утулган ар бир команда мелдештен “ыргып” кетет. Ошондой эле 1/8 финалдан тартып футболчулардын киргизген голдору кымбатка бааланып, командалар анык жеңиштин даамын же жеңилүү ызасын татышат.

Бул тепкичтеги утулуу коркунучун эске алып, көптөгөн күйөрмандар атаандаш командага сүр көрсөтүү максатында “Тозокко кош келдиңиз!” деген чакырыкты колдоно башташат. Биз 16 команданы тайпадагы жеңиштери менен куттуктап, марада күлүктү тосуп чыккан саяпкердей кубанычтуу тосуп алмакчыбыз...

Мелдеш жадыбалы менен таанышып алыңыз