Орусиянын Мамлекеттик Думасы футбол боюнча улуттук курамдын башкы машыктыруучусу Фабио Капеллону чакырып, угууну пландоодо

Орусиянын Мамлекеттик Думасына улуттук курама команданын башкы машыктыруучусу Фабио Капеллону чакыруу пландалууда. Анда Орусия курамасынын оюнунун өсүшү боюнча кандай чара көрүү керектиги тууралуу сөз болот. Бул тууралуу бүгүн, 2-июлда чет элдик маалымат булактары кабарлады.

Маалыматка ылайык, Орусиянын Мамлекеттик Думасынын Дене тарбия жана спорт боюнча комитети 3-октябрда Орусияда 2018-жылы өтүүчү футбол боюнча Дүйнө чемпиондугун өткөрүү үчүн даярдыгын баалоо иретинде парламенттик угуу өткөрөт. Ага спорт министри, улуттук курама команданын машыктыруучусу чакырылат.

Кошумчалай кетсек, 2014-жылы өткөн футбол боюнча Дүйнө чемпиондугунда Орусия өз тайпасынан чыга албай калды.

Автор: Максат Кудайбердиев
Фото: Интернеттен алынды