Эрмек Нурбаев: “1994-жылкы Дүйнө чемпиондугунда италиялык Роберто Баджо мени ыйлатканын өзү сезген эмес”

Эрмек Нурбаевди "ыйлаткан" Роберто Баджо пенальти тебе албай калып, бразилиялыктарга кубаныч тартуулаган.

Эрмек Нурбаев күлкү менен катар футболду да сүйөрүн бир нече ирет далилдей алган. Аны футбол боюнча өлкө чемпиондугунун жана Кыргызстан улуттук курама командасынын айрым оюндарында стадиондон көрүүгө болот. Футбол сүйүүчүлөрүнүн катарын толуктаган Эрмек мырза учурда кызуу жүрүп жаткан футбол боюнча Дүйнө чемпиондугу тууралуу SUPER.KG порталына ой бөлүштү.

- Эрмек, Дүйнө чемпиондугун көрүп жатсаңыз керек. Кайсы командага жан тартуудасыз?

- Оюндарды колдон келишинче калтырбай көргөнгө аракет кылып жатам. Биздин чөйрөдө футбол сүйгөн жигиттер бар. Ошолордун ичинен төртөөбүз аталган чемпиондукка катышкан командалардын ичинен экиден команда тандап, мелдешкенбиз. Ортодо кызыктырган байгебиз бар. Мен Голландия менен Германияны тандагам. Азырынча бул командалар жарым финалга чыгышты.

- Германия менен Голландия финалда ойноп калуусу мүмкүн. Сиз кайсы тарапта болосуз?

- Бул эки команда финалга чыкса, мага кубанычтуу болот. Анда бирине да тартпай, бейтарап болом.

- Бразилиядагы Дүйнө чемпиондугу тууралуу оюңузду айта кетсеңиз...

- Мелдеш тиешелүү деңгээлде өтүп жатат. Буюрса, биздин көзүбүз өткөнчө Дүйнө чемпиондугун Кыргызстанда уюштуруп калсак, чоң жетишкендик болот эле.

- Өзүңүз качантан бери Дүйнө чемпиондугун көрүп келесиз?

- 1994-жылы көрүп баштагам. Анда Италияга жан тарткам. Финалда Роберто Баджо чечүүчү пенальтини тебе албай калган. Ошону сезип, ыйлаганым эсимде. Бирок ошону Роберто Баджо өзү сезген эмес.

Автор: Максат Кудайбердиев