Инчхон-2014: Бүгүн боксчулар Азат Усеналиев менен Акжол Сулайманбек уулу чейрек финалдык беттештерин өткөрөт

Түштүк Кореянын Инчхон шаарында өтүп жаткан Азия оюндарынын алкагында бүгүн, 29-сентябрда 2 кыргызстандык мушкер чейрек финалдык беттештерин өткөрөт. Бул тууралуу мелдештин расмий сайты билдирет.

Маалыматка ылайык, 60 килограмм салмакта Акжол Сулайманбек уулу монголиялык Отгондалай Доржнямбу менен кез келсе, 52 килограмм салмакта Азат Усеналиев пакистандык Мухаммад Васеем менен беттешет. Ошондой эле 75 килограмм салмактык бөлүктө жарым чейрек финалда Азамат Каныбек уулу индиялык Кришан Викаска каршы рингге чыгат.

Кошумчалай кетсек, аталган мушкерлерден тышкары кыргызстандыктардан Турат Осмонов (49 килограмм салмакта), Өмүрбек Малабеков (56 кг) жана Эрмек Сакенов (64 кг) алгачкы беттештерин утуп, чейрек финалдык жолдомолорду алышкан.

Автор: Максат Кудайбердиев