Түштүк Кореянын Инчхон
шаарында өткөн Азия оюндарында Кыргызстан курамасы командалык эсепте 30-орунду
ээледи. Тамашалуу түрдө айтканда, карандай
чай ичкенине карабай спортчуларыбыз кара күчкө салып, 6 медаль (2 күмүш, 4 коло)
алып келишти. Өкмөттөн тийиштүү көңүл бурулбаганын спортчулар да, көптөгөн спорт
ишмерлери да далилдеп бере алышат. Ошентсе да өкмөт бул оюндардын алдында план
коюп, “Кыргызстан курамасы 3 медаль алышы керек” деген милдеттенме берген. 115
спортчу жиберип, анын үчөөсүнөн гана үмүттөнгөн өкмөттүн планы сан жагынан алып
караганда, эки эсеге аткарылды. Бирок планда алтын медаль да бар болчу. Бул
жагынан алып караганда, өкмөт максатына жеткен жок. Ал эми бир катар спорт
ишмерлери SUPER.KG порталына маек куруп, спорт тармагынын жакшыруусу үчүн өкмөттүн
спортко болгон мамилеси жакшыруусу керектигин баса белгилешти. Ошого карабай биз менен маектешкендердин көбү Кыргызстандын Азия оюндарындагы көрсөткүчүн “канааттандырарлык”
деп баалашты.
Кадырбек Эргешов, Дене тарбия жана спорт мамлекеттик агенттигинин
директору:
- Негизи, Азия оюндарына
катышкан 45 мамлекеттин ичинен медаль албай калган курамалар дагы болду. Биз
кичинекей бюджетке карап 3 медаль пландаганбыз, 6 медаль алып, планды ашыгы
менен толтурдук. Ушуларды карап туруп, анан кантип “канааттандырарлык эмес
жыйынтык” дегенге ооз барат? Көп медаль алганга мүмкүнчүлүк бар болчу, бирок
көптөгөн себептерден улам аны ишке ашыра алган жокпуз. Бул Азия оюндары бизге
сабак болду. 2 жылдан кийин Олимпиада оюндарына кандай жол менен баруу керек
экенин ушул оюндардын жыйынтыгына карап билишибиз керек.
Шаршен Касенов, эркин күрөш боюнча машыктыруучу:
- Кыргызстан бул жолку Азия
оюндарында эмнени эксе, дал ошону алды. Тактап айтканда, өкмөт бөлгөн каражатына,
спортко кылган мамилесине жараша жыйынтык алды. Бокс боюнча Азат Усеналиев,
грек-рим күрөшүндө Калыбек Жолчубековдун медаль алганга мүмкүнчүлүгү бар болчу.
Өз жеринде кореялыктар калыстыктан жазып, мыкты спортчуларыбызды токтотуп
коюшту. Ошентсе да бул канааттандырарлык жыйынтык.
Адылхан Бекболотов, бокс боюнча улуттук курамдын башкы машыктыруучусу:
- Мен “канааттандырарлык
эмес” деген жыйынтыкка келдим. Анткени бокс боюнча Өмүрбек Малабеков, Азат Усеналиев
сыяктуу мушкерлер медаль аларына ишенгем. Бирок спорттогу ийгилик каршылаштар
тарапка жылмайды. Бокс боюнча акыркы 12 жылда Кыргызстандан медаль уткан эмес. Дене
тарбия жана спорт мамлекеттик агенттигинен 1 медаль утуу тууралуу
милдеттенме алдык. Милдеттенмени аткарганыбыз менен, максаттарыбызга
жетпей калдык. Өкмөт акчаны убагында бербесе, спорттук шаймандар
жетишсиз болсо, анан кантип жыйынтык болсун? Спортчулар мелдешке катышуу үчүн ар
кимден акча сурап жүргөнү туура эмес... 10-15 жылдан кийинки абалыбызды ойлогуң
келбейт, мындай жүрүш менен спортту жоготуп алабыз.Улан Молдодосов, Оор атлетика федерациясынын вице-президенти:
- Бул Азия оюндарында 6 медаль алдык, жыйынтыкты “канааттандырарлык” деп айта алам. Ар бир спорттун кайсы континентте кандай өнүккөнүнө, анан өтө турган системине көңүл буруш керек. Мисалы, оор атлетика Азияда катуу өнүккөн. Ушул оюндарда эле 12 дүйнө рекорду жаңыланды. Бул катуу атаандаштыктан кабар берет. Башка спорт түрлөрүндө да атаандаштык алсыз дегенге болбойт. Болгону көп спорт түрлөрүндө чүчү кулак системи бар. Медаль алар-албасың ошол чүчү кулак аркылуу тандалган атаандашка байланыштуу болот. Негизи, мамлекет кыргызга аброй алып келе турган спорт түрлөрүнө көп каражат бөлүшү керек. Мени футболчулар таң калтырды, мына ойноп, жыйынтык көрсөтсө болот.
