Кыргызстандык балбандар Нью-Йорк шаарында өтө турган эл аралык мелдешке жөнөп кетишти

4-ноябрдан 5-ноябрга караган түнү кыз-келиндер күрөшү жана эркин күрөш боюнча курам АКШга “New York Open” эл аралык мелдешине катышуу үчүн жөнөп кетишти. Бул тууралуу SUPER.KG порталына кыз-келиндер курамасынын башкы машыктыруучусу Нурбек Изабеков билдирди.

Анын айтымында, мелдеш 9-11-ноябрь күндөрү Нью-Йоркто өтөт. Ага кыз-келиндерден Айсулуу Тыныбекова (58 килограмм салмакта), уландардан Улукбек Жолдошбеков (57 кг) менен Догдурбек уулу Эламан (70 кг) катышат.

“Бул мелдеш жыйынтыкталган соң АКШда 1 апта калып, машыгуу сборун өткөрүүнү пландап жатабыз. Анткени 2015-жылдын жай айларында Лос-Анжелесте Дүйнө чемпиондугу өтөт. Бул Дүйнө чемпиондугунда “Рио-де-Жанейро-2016” Олимпиадасына жолдомо ойнотулат. Америкага жөнөп жатканыбыздын себеби да ушул, бул жактын абасы, шарты менен таанышууну максат кылуудабыз”,- деп кошумчалады Н.Изабеков.

Автор: Максат Кудайбердиев
Фото: Нурдин Султамбаев