Өткөн суткада өлкө аймагында 9 өрт кырсыгы катталып, Токтогул районунда турак үйдүн чатыры толугу менен күйүп кетти

Жарандык коргонуунун Өрткө каршы күрөшүү кызматынын маалыматы боюнча, акыркы суткада өлкө аймагында 9 өрт кырсыгы катталып, аларды өчүрүүгө 9 өрт өчүрүү бөлүмү тартылган.

Өзгөчө кырдаалдар министрлигинин басма сөз кызматынын 2-декабрда берген маалыматына ылайык, Бишкек шаарында 1, Чүй облусунда 2, Ысык-Көл облусунда 1, Жалал-Абад облусунда 3, Баткен облусунда 1,Талас облусунда 1 өрт кырсыгы катталган.

Токтогул районуна караштуу Торкен айыл өкмөтүндөгү үйлөрдүн биринен өрт чыгып, 48 чарчы метр турак үйдүн чатыры, 16 чарчы метр бөлмө, 2 терезе, төшөнчүлөр толугу менен күйүп кетти. Учурда өрттүн келип чыгуу себеби такталууда.

Ошондой эле Манас районуна караштуу Кызыл-Жылдыз айылындагы үйлөрдүн биринде өрт кырсыгы катталды. Анын кесепетинен үй эмеректери, туш кагаз, эшик, терезе күйүп кетти. Өрттүн келип чыгуусуна электр жабдууларын куроодо эреженин бузулушу себеп болгон.

Автор: Мальвина Уметбекова
Фото: Интернеттен алынды