Хамес Родригестин Уругвайга киргизген голу "Жылдын кооз голу" сыйлыгына татыды

12-январдан 13-январга караган түнү Эл аралык футбол федерациясы (ФИФА) салтанаттуу кече уюштуруп, 2014-жылдын мыктыларын аныктады. Кеченин жүрүшүндө Ференц Пушташтын атын алып жүргөн "Эң кооз гол" сыйлыгы да ээсин тапты. 2014-жылы киргизилген голдордун ичинен колумбиялык футболчу Хамес Родригестин Уругвайга киргизген голу бул наамга татыды.

Кошумчалай кетсек, бул наам үчүн жарышта алдынкы үчтүккө ирландиялык футболчу айым Стефани Роченин, колумбиялык Хамес Родригестин жана голландиялык Робин ван Персинин голдору кирген. Cыйлыкка башкы 3 талапкердин катарына биринчи ирет айым футболчунун голу киргени айтылып келген.