Мушкер Азат Усеналиев Дүйнөлүк бокс сериясынын алкагында алгачкы беттешин техникалык нокаут менен жеңип алды

Кыргызстандык мушкер Азат Усеналиев Бүткүл дүйнөлүк бокс сериясынын алкагында "Украинские атаманы" клубунун курамында биринчи беттешин өткөрүп, техникалык нокаут менен утуп алды. Мелдештин расмий сайты кабарлагандай, 23-январь түнү "Украинские атаманы" клубу британиялык командага каршы туруп, жалпысынан 5 беттеш орун алган. Анын үчөөсүндө украиналыктар жеңип чыгышты. 52 килограмм салмакта рингге чыккан кыргызстандык мушкер Азат Усеналиев дүйнөлүк рейтингде 2-орунду ээлеп турган британиялык Эндрю Селби менен кез келди. Беттеш Азаттын үстөмдүгү астында өтүп, узактыгы болгону 4 раундга созулду. Жаракат алган Э.Селбинин тарапташтары беттешти мөөнөтүнөн мурун токтотуу сунушун беришти. Жыйынтыгында Азат техникалык нокаут менен жеңип, командасына да жеңиш алып келди.

Кошумчалай кетсек, бул эки мушкер өткөн жылы да кез келип, анда Азат Усеналиев утулуп калган.