Теннис боюнча Австралиянын Ачык чемпиондугунун финалында Мария Шарапова менен Серена Уильямс кез келет

Теннис боюнча Чоң шлем түркүмүнө кирген 4 мелдештин бири - Австралиянын Ачык чемпиондугу жыйынтыкталуу алдында турат. Кыз-келиндер арасында чемпиондукту орусиялык Мария Шарапова менен америкалык Серена Уильямс талашмай болушту. Мелдештин расмий сайты кабарлагандай, финал 31-январда орун алат.

Маалыматка ылайык, жарым финалда 33 жаштагы америкалык теннисчи айым 19 жаштагы мекендеши Мэдисон Кисти утуп алды (7:6 (7:5), 6:2). М.Шарапова болсо жарым финалда орусиялык Екатерина Макарованы утту.

Кошумчалай кетсек, мелдештин кыз-келиндер арасында өткөрүлүп жаткан бөлүгүнүн байге фонду 15 миллион долларды түзөт.

Автор: Максат Кудайбердиев