Кара-Көлдө балык уулаганга кетип дайынсыз жоголгондордун биринин денеси табылды

Кара-Көлдө балык уулаганга кетип дайынсыз жоголгондордун биринин денеси табылды. Бул тууралуу бүгүн, 9-февралда Өзгөчө кырдаалдар министрлигинен билдиришти.

Маалыматка ылайык, издөө иштеринин натыйжасында сууга чөккөн 23 жаштагы Нурбек Бекташовдун жансыз денеси саат 14:30 чамасында табылып, туугандарына өткөрүлүп берилди. Учурда дайынсыз жоголгондордун экинчиси Нуркалый Юсупбековду издөө иштери улантылууда.

Эске салсак, 4-февраль күнү саат 17:00 чамасында Бишкек-Ош унаа жолунун 395-чакырымында Нарын дарыясына 3 адам кайык менен балык уулаганы чыккан. Кайык оодарылып, 2 адам чөгүп кеткен, 1 адам тирүү калган. Издөө иштерине 4 куткаруучу жана балдардын туугандары тартылган болчу.

Автор: Мальвина Уметбекова