Ошто дагы бир көпүрө курулат. Бул тууралуу 24-февраль күнү Ош шаарынын мэри Айтмамат Кадырбаев №3-Сулайман-Тоо аймактык кеңешинин тургундары менен болгон жолугушуусунда айтканын мэриянын басма сөз кызматы билдирди.
Маалым болгондой, жолугушууда калаа башчысы жергиликтүү тургундарга 2015-жылы аткарылган жумуштар тууралуу маалымат берип, ушул жылы пландалган иштер менен ой бөлүштү.
"Шаарыбызды социалдык-экономикалык жактан өнүктүрүүдө мэрия тараптан бардык күч-аракеттер жумшалууда. Акыркы эки жылда калаабызда бир топ алгылыктуу иштер аткарылды. Алардын катарында Навои көчөсүндөгү көпүрөнүн курулушу бар. Көпүрөнүн курулушунан үнөмдөлгөн акча каражатына Курманжан датка аймактык кеңеши менен Туран аймагын бириктирген көпүрөнүн курулушун баштаганбыз. Анын жалпы сметалык баасы 73,0 миллион сомду, ал эми тендердик баасы 43,6 миллион сомду түзүп, курулуш иштери кызуу жүрүүдө. Бул көпүрөнүн курулушунан үнөмдөлгөн акчага шаардагы борбордук стадиондун аймагында Сай-Бою көчөсү менен Тилеке баатыр көчөсүн бириктирген дагы бир чоң көпүрө курулат. Биздин максат - курулуштарга тендерлерди өткөрүү менен акча каражатын үнөмдөп, сапаттуу бүтүрүү, каражатты туура пайдалануу”,- деп билдирди Кадырбаев.