Япониянын түштүк-батыш тарабындагы Кюсю аралында жайгашкан Кумамото шаарында жер силкинүүлөр кайталанып,14-апрелден бери каза тапкандардын саны кеминде 40 адамга жетти. Ооруканада оор абалда жаткандардын да саны арбып, учурда 80 адам оор абалда экени айтылууда.
Чет элдик маалымат каражаттары жазып чыккандай, кечээ кечинде күчү очогунда 7,3 баллга жеткен жер титирөө кайталанып, бүгүн коңшу Оита шаарында да күчү 5,3 баллга жеткен жер силкинүү катталды. Имараттар кыйроого учурап, жалпы 2000дей адам жеңил жаракат алганы айтылып жатат. 100 миң адам коопсуз жайларга эвакуацияланып, учурда аталган аймакта газ, электр жарыгы жок, жергиликтүү калк көчөлөрдө жашоого аргасыз болууда. Аталган аймактарда тиешелүү кызматтар кыйроонун кесепеттери менен күрөшүп жатышат.
Айта кетсек, 14-апрелде Япониянын түштүк-батыш тарабындагы Кюсю аралында жайгашкан Кумамото шаарында жергиликтүү убакыт боюнча саат 16:11 чамасында жер титирөө катталган. Анын күчү очогунда 7 баллга жеткен. Жер титирөөнүн кесепетинен имараттар кыйроого учурап, 400дөй адам жаракат алып, ооруканага жаткырылган. Кээ бир кыйроолор тилкесинде өрт токтобой жаткандыгынан улам газ берүү токтотулуп, электр жарыгы өчүрүлгөн.