Ош шаарында жаңы көпүрө курулуп, пайдаланууга берилди. Бул тууралуу бүгүн, 1-сентябрда Ош шаардык мэриясынын басма сөз кызматынан билдиришти.
Маалыматка ылайык, пайдаланууга берилген көпүрө Курманжан датка, Төлөйкөн жана Туран айылдарын бириктирип турат. Көпүрөнүн ачылуу аземине Кыргыз Республикасынын Премьер-министри Сооронбай Жээнбеков, Ош шаарынын мэри Айтмамат Кадырбаев, шаардык кеңештин депутаттары, мекеме-ишканалардын жетекчилери, студенттер жана шаар тургундары катышты.
“Жаңы ачылган көпүрө студенттер үчүн эң ыңгайлуу болду. Бул эстакадалык көпүрөгө бөлүнгөн акча каражатынан үнөмдөлгөн суммага курулду. Ал эми студенттер шаарчасындагы жаңы көпүрөдөн сарамжалданган акчага үчүнчү көпүрөнү пландаштырып жатабыз. Жасалып жаткан иш-аракеттер жаштардын жаркын келечеги, шаардыктардын ыңгайлуу жашоосу үчүн кам көрүү болуп эсептелинет”, - деп билдирген шаар мэри Кадырбаев.
Белгилей кетсек, курулуш иштери “Сутранспромжилстрой” жоопкерчилиги чектелген коому тарабынан жүргүзүлдү. Жалпы сметалык баасы 73,0 миллион сомду, ал эми тендердик баасы 43,6 миллион сомду түзгөн. Жолдун жалпы узундугу 0,5 чакырым, ал эми көпүрөнүн узундугу 36, туурасы 22 метрди түзөт.