Жалал-Абад шаарында "ишкерди башка аткан" деп шектелген эки жаран кармалды. Бул тууралуу SUPER.KG порталына Жалал-Абад облустук ички иштер башкармалыгынан билдиришти.
Маалыматка караганда, кылмышка шектүү катары Майлуу-Суу шаарынын 24 жаштагы тургуну Д.А. жана анын досу, Сузак районунун 23 жаштагы тургуну Р.Н. кармалган. Алар айдап жүргөн унаадан далил буюм катары тапанча табылган.
Алар ишкерди бир канча күн артынан аңдып жүрүшүп, 18-январь күнү Д.А. досунун унаасы менен барып, 63 жаштагы Абдусатар Азизовду башка атып кетишкен. Жабырлануучу Жалал-Абад облустук ооруканасынын жандандыруу бөлүмүнө жеткирилген, тилекке каршы, анын өмүрүн сактап калууга мүмкүн болгон эмес. Каза тапкан жаран Жалал-Абад шаарындагы "Таж-Махал" кафесинин ээси болгон.
Учурда "адам өлтүрүү" боюнча кылмыш иши козголуп, тергөө амалдары жүрүп жатат. Кылмышка шектүүлөр убактылуу кармоочу жайга киргизилишти.