Бишкекте телефонун жоготуп алган шаар тургуну смартфонун ким көтөрүп жүргөнүн тиркеме аркылуу аныктап алды. Назар Канаев аттуу интернет колдонуучунун айтымында, өткөн жуманын аягында уюлдук телефонун жоготуп алган. Ал эми 16-майда анын смартфону менен селфи сүрөткө түшкөн белгисиз адамдын фотолору Dropbox программасына келип түшкөн.
"Бүгүн Dropbox'ка сонун сүрөттөр келди. Жаш жигит өзүнүн жүзүн менин телефонума тартыптыр. Жакындан таанышуу үчүн чалсам алган жок, уялчаак экен", - деп жазат Назар Канаев аттуу интернет колдонуучу Фейсбуктагы баракчасына.
Ошондой эле ал анын смартфону менен селфи сүрөткө түшкөн баланы издеп табууга жардам сураган.
Айта кетсек, Dropbox тиркемеси телефондун камерасына тартылган сүрөттөрдү автоматтык түрдө сактап турат. Сүрөттөрдү үйдөгү компьютерден да көрсө болот.